أنا وأنت لانفهم شيئا . . هم وحدهم أصحاب المعرفة والمفهومية فى كل شئ حدث ويحدث وسيحدث على أرض مصر . وكيف لا.. وهم لديهم كل شاردة وواردة وأكليشيهات معلبة مثل الخيانة والعمالة وبتوع الأجندات والكنتاكى؛ والتمويل اللى أسمه ايه الأجنبى وعلى كل لون يا باتستا . وكيف لا.. وهم أسيادى وأسيادك وهم من يحمونك ويحموا أمنك فى البر والبحر والجو؛ وهم يحاربون الناس الوحشين ويمنعوا عنك وعنا خطر الأرهاب والأرهابيين - وقانا الله لدغتهم - قل أمين .

وكيف لا.. وهم من يعرف مصلحتك أكتر منك واللى أكبر منك بيوم يعرف مصلحتك بسنة. وكيف لا.. وهم اللى حيخلوا لك مصر أد الدنيا وأنت جالس ولا مؤاخذة نايم على جنبك فى بيتك أمنا مطمئنا على قوت يومك ويوم عيالك واللى خلفوك كمان ؛ وبتاكل كل مالذ وطاب من الفراخ أم 7 بمية جنيه والسمك واللحمة البرازيلى المعتبرة.

وكيف لا.. وأنت بتروح شغلك - أن كان لك شغل - وبتركب مواصلاتك دون أن يستوقفك فلان أوعلان - وقانا الله ووقاك شرهم - ويقولك أنت مين يلا وخارج من بيتك فى عز الضهر بتعمل أيه ؟

وكيف لا.. وهم من يؤمنون تعليم أولادك وأحفادك وتعليمك أنت بذات نفسك دون أن يأخذوا منك أبيض ولا أسود اللهم إلا بضعة مئات من الجنيهات تدفعها سنويا للتعليم المجانى ؛ وبالطبع هما ملهمش أى دعوة بألاف أخرى تدفعها من دم قلبك دروسا خصوصية للمدرسين الوحشين !

وكيف لا.. وهم أصحاب المشاريع العملاقة والطرق الجبارة وأنت برده لسه قاعد فى بيتك مأنتخ ومش عاجبك العجب ولا الصيام فى رجب . وكيف لا.. وهم الذين يحثونك ليل نهار على المشاركة فى الأنتخابات وأنت برده - شوف أزاى - لسه قاعد ومتأنتخ فى بيتك وعمال بتنظر.

وكيف لا.. وهم يحلمون بوطن ولا فشر امريكا ولا أوروبا وأنت لسه قاعد بتسأل أسئلتك الخايبة عن : فواتير الغاز والكهربا والمية والمواصلات وطلبات العيال وأم العيال اللى ما بتنتهيش أبدا.

قم وصحصح شوية .. الناس دى عارفة مصلحتك كويس قوى؛ بس أنت البعيد اللى فقرى أرارى من يومك ؛ ولسه بتفكر تحت رجلك اللى مش موجودة أصلا ؟!